SEJARAH TRENGGALEK

Ringkesan Sejarah Trenggalek punika kapendhet saking Buku Babon “Sejarah Trenggalek” ingkang sampun kasil kaimpun dening Panitia Sejarah Trenggalek saha para sarjana sejarah Pawiyatan Luhur Institute Keguruan dan Ilmu Pendidikan (IKIP) Malang. Ingn ringkesan punika namung kawedharaken bab-bab ingkan baken saha ingkang premana kemawon. Wondene ringkesan punika kaperang dados 5 (gangsal) perangan :

A. Jaman Pra Perdikan
B. Jaman Perdikan :
1. Perdikan Hindu.
2. Perdikan Islam.
C. Jaman Trenggalek Wiwitan.
D. Jaman Trenggalek Ginarba.
E. Jaman Trenggalek Wibawa.

A. Jaman Pra Perdikan

Ing jaman Pra Perdikan utawi jaman Pra Sejarah, ing laladan Trenggalek ugi sampun kadunungan tetiyang ingkang kabudayanipun taksih prasaja sanget kados ing papan-papan sanes.Barang-barang kina ingkang sampun pinanggih ing laladan Trenggalek asung pitedah wohing kabudayan jaman Nirleka, kadosta : Watu Saji, Watu Dakon, Lumpang Watu, Watu Palinggih, lan sapanunggalanipun. Barang-barang wau pinanggih ing papan panggenan ingkang limrahipun dados margi ambah-ambahipun tetiyang nalika samanten, inggih ing antawasipun Pacitan-Panggul-Wajak Tulungagung. Jaman punika kalebet Jaman Megalitikum utawi Jaman Neolitikum.

B. Jaman Perdikan

Jaman Pra-Sejarah katutup dening Jaman Sejarah utawi Jaman Perdikan, inggih punika wancinipun tetiyang sampun tepang kaliyan sastra-tulis, senadyan wujuding tulis taksih prasaja. Ing jaman punika laladan Trenggalek kalebet wewengkon panguwaosipun mPu Sindhok. Minangka bukti sejarah sampun kathah prasasti yasanipun mPu Sindhok ingkang kapanggihaken dening para Sarjana Sejarah, ing antawisipun Prasasti Kampak. Wondene mPu Sindhok ngasta keprabon ing Jawi Wetan nalika Tahun 851 Saka utawi 929 Masehi.

Saking Prasasti Kampak punika saged kawaos, bilih Trenggalek nampi kanugrahan kamardikan, inggih tlatah Perdikan Kampak. Kajawi punika Prasasti wau nelakaken jembaring panguwaosipun mPu Sindhok inggih punika : ing sisih Kidul ngantus dumugi ing Samodragung (Samodra Indonesia), inggih punika kalebet laladan Panggul, Munjungan saha Prigi. Dene ing sisih Eler ngantos ing tlatah Dawuhan, ingkang samangke dumunung wonten saelering kitha Trenggalek.

Ing Prasasti Kampak wau ugi martelakaken bilih tanah utawi bumi punika satuhu tanah ingkang kamulyakaken; awit tanah utawi bumi punika mujudaken kanugrahan saking :

Bathara I Sang Hyang Prasadha Kabhaktian I Pangurumbigyan I Kampak.

Krajan Kahuripan nunten kalajengaken dados wilayah Krajan Kedhiri, ingkang kaasta dening para raja trah Airlangga. Dene raja Kedhiri ingkang pungkasan inggih punika Prabu Kertajaya ingkang ajejuluk Sri Sarweswara Triwikramamawatara Ninditya Srenggalancana Digwijayatunggadewa ingkang ugi katelah kawastanan Prabu Dhandhanggendhis.

Inggih ing jamanipun Prabu Kertajaya punika, Trenggalek sampun wiwit kocap ing panggung sejarah lumebet ing jaman Perdikan. Minangka tandha yektinipun, inggih punika prasasti tetilaran yasanipun Prabu Kertajaya ing Kamulan, ingkang salajengipun katelah Prasasti Kamulan. Mawi angka Tahun 1116 Saka utawi 1194 Masehi.

Ing sakawit Prasasti Kamulan punika pinanggih ing dusun Kamulan, Kecamatan Durenan, Kabupaten Trenggalek. Prasasti punika ingkang sisih ngajeng ngewrat ukara 31 larik, dene ing perangan sisih wingkin cacahipun ukara wonten 33 larik. Saperangan Prasasti wau mratelakaken bilih nalika samanten Prabu Kertajaya kapeksa jengkar saking kedhaton Kedhiri jalaran karoban ing mengsah. Awit saking asung pambiyantu dalasan lelabetanipun para kawula dasih ing Kamulan, Prabu Kertajaya saged unggul ing yudha nundhung lan mbrastha mengsah saking kedhaton Kedhiri, lajeng paring kanugrahan Tanah Perdikan dhateng kawula ing Kamulan, Trenggalek. Adhedhasar Prasasti Kamulan punika, Trenggalek sampun madek peprentahan piyambak (Swatantra).

Manut panalitining para priyantun ingkan sampun lebda ing kagunan budaya saha miturut wohing panalitinipun para ahlining sejarah, inggih namun Prasasti Kamulan tetilaranipun Prabu Kertajaya punika ingkang saged lan kiyat minangka pathok-ugering pandom kangge miyak – purwakaning Sejarah Trenggalek. Wondene payerat lan adeging Prasasti Kamulan punika dhawah ing wulan Bhadrawada perangan Suklapaksa, dinten Budha Kaliwuan tahun Saka 1116.

Adhedhasar Prasasti Kamulan punika, lahir-adeging Trenggalek saged katetepaken inggih punika dhawah Rebo Kliwon tanggal 31 Agustus 1194 M.

Jaman Perdikan punika kaperang dados kalih, inggih punika Jaman Perdikan Hindu lan Jaman Perdikan Islam. Ing Jaman Perdikan Hindu, kathah sanget wohing kabudayan ingkang awujud candhi, reca, lingga, yoni lan sapanunggalanipun. Tetilaran

barang-barang patilisan candhi-candhi wau taksih kathah pinanggih ing laladan Trenggalek, kadosta : ing Dompyong – Bendungan, Ngreco-Sukorame-Gandusari, Watulimo, lan sanes-sanesipun.

Sapengkeripun Jaman Perdikan Hindu, kasusul Jaman Perdikan Islam, Inggih ing wekdal mekaring agama Islam punika perdikan-perdikan Hindu dados perdikan-perdikan Islam. Wonten ing Jaman Perdikan Islam, ingkang saged kacathet dening para Sarjana Sejarah namung kalih, inggih punika :

1. Pondok Pesantren Sumbergayam ingkang kapetang sepuh piyambak.

2. Paraga Menak Sopal, Ing Sela Nisanipun ingkang garwa, rinenggo mawi Candra Sengkala Memet ingkang saged kawaos “Sirnaning Puspita Cinatur Wulan” utawi tahun 1490 Saka, utawi tahun 1568 Masehi.

C. Jaman Trenggalek Wiwitan

Saparipurnaning Jaman Perdikan Islam, lajeng ngancik Jaman Trenggalek Wiwitan. Menggah Jaman Trenggalek Wiwitan punika winengku ing lebeting tahun 1830 ngantos tahun 1932 M, wekdal samanten kebak owah-owahan ing tata kaprajan dening Walandi.

Prastawa saderengipun tahun 1930 ingkang saged nggorekaken swasana bumi Tanah Jawi inggih punika VOC nalika samanten nindakaken pepejah, merjaya warga China kathah sanget. Prastawa punika misuwur nama “Geger Pacinan” utawi “Perang Pacina” ing Betawi nalika tanggal 10 Oktober 1740. Inggih kadadosan punika ngantor kuwawa nggegeraken Kraton Kartasura, awit Mas Garendi ingkang ugi katelah Sunan Kuning paring pitulungan dhateng warga China ingkang damel ontran-ontran, mengkang kuwaosipun Kraton Kartasura nalika tanggal 30 Juni 1742. Ngantos Sunan Paku Buwono II kepeksa jengkar, mlajar ngungsi dhateng ing Ponorogo. Awit saking lelabetanipun Bupati Mertodiningrat, Sunan Paku Buwono II saged mbrastha lan nyirep reretu ingkang damel ontran-ontran wau. Saking suka renaning penggalih, Sunan Paku Buwono II kepareng paring kanugrahan dhumateng Bupati Mertodiningrat, inggih punika putranipun ingkang asma Sumotruno, kajumenengaken Bupati ing Trenggalek. Inggih Sumotruno punika Bupati Trenggalek wiwitan; salajengipun urutan Bupati Trenggalek kados kasebat ing ngandhap inggih punika :

1. Sumotaruno Bupati Trenggalek Wiwitan;

2. Bapak Bupati Ngabehi Surengrono (ing Jaman Perang Mangkubumen) Prajanji Gianti nalika tanggal 13 Pebruari 1755, Kabupaten Trenggalek kaperang dados kalih, inggih punika :

• Perangan sisih wetan kalebet Kabupaten Ngrawa, dene
• Perangan sisih kilen kalebet Kabupaten Pacitan.

3. Bapak Bupati RT Mangunnegoro;

4. Bapak Bupati RT Aryo Kusumo Adinoto;

5. Bapak Bupati R. Ngabehi Joyopuspito (RT Pusponegoro);

6. Bapak Bupati R. Gondokusumo (Tumenggung Sumo Adiningrat) tahun 1845 - 1850;

7. Bapak Bupati Mangun Diredjo, tahun 1850 – 1894;

8. Bapak Bupati Wijoyo Kusumo, tahun 1894 – 1904;

9. Bapak Bupati Purbo Negoro, wiwit tahun 1904 – 1932, ingkang minangka panutuping Jaman Trenggalek Wiwitan.

D. Jaman Trenggalek Ginarba

Ing Jaman Trenggalek Ginarba punika mboten katha prastawa ingkang saged kacathet dening para Sarjana, kajawi namung prastawa Penyerahan Kedaulatan utawi pasrahipun Pamerintahan Walandi dhateng Pamerintah Republik Indonesia (RI) saged kaleksanan. Pamerintah Walandi dipun wakili dening Majoor Crew lan Karis Soemadi, wondene Pamerintah Republik Indonesia dipun wakili dening Bapak Moekardi saha Bapak R. Roestamadji tuwin Bapak Kardjono.

E. Jaman Trenggalek Wibawa

Adhedhasar Undang-Undang Nomor 20 Tahun 1950, Kabupaten Trenggalek hambawahi 4 (papat) Kawedanan, inggih punika :

1. Kawedanan Trenggalek;
2. Kawedanan Karangan;
3. Kawedanan Kampak; lan
4. Kawedanan Panggul.

Wondene Bupati-Bupati ing Jaman Trenggalek Wibawa, inggih punika :

1. Bapak Bupati Notosoegito;

2. Bapak Bupati R. Lantip, wekdal punika sampun kadhapuk DPRS ingkang dipun sesepuhi dening panjenenganipun Bapak R. Oetomo;

3. Bapak Bupati Moeprapto;

Kanthi alelandhesan UU angka 20 tuwin angka 12 tahun 1950, sarta Peraturan Pamarentah angka 52 Tahun 1950, wangsul manunggaling tlatah Trenggalek dados kasunyatan saengga amangke punika.

Dene ingkang sinengkakaken ing ngaluhur jumeneng Bupati panjenenganipun Bapak Moeprapto wiwit tanggal 27 Desember 1950 dumugi 21 Januari 1958, rikala Tahun 1951 inggih ing jamanipun BupatiMoeprapto punika bebrayan agung Trenggalek bebasan kadhos kedhawahan ndaru ing awanci siyang; dene Bapak Presiden RI ingkang Kapisan inggih panjenenganipun Ir. Soekarno inggih Sang Proklamator kepareng rawuh ing Kabupaten Trenggalek ingkang taksih enggal punika, malah kasdu medharsabdo ing Aloon-aloon Trenggalek;

4. Bapak Bupati Abdul Karim Diposastro, Gegandhengan kaliyan Kepala Daerah Bapak R.Soepangat Prawirawinata;

5. Bapak Bupati Soetomo Koencahya, ingkang dipun amanaken dening Pamerintah, awit prastawa G 30 S/PKI.

6. Bapak Bupati M. Hardjito, wiwit tanggal 1 Oktober 1965 ngantor 30 Januari 1967, inggih Bapak M. Hardjito punika minangka cucuking lampah jaman Orde Baru ing Kabupaten Trenggalek;

7. Bapak Bupati Moeladi, wiwit tanggal 1 Pebruari 1967 ngantos tanggal 1 Oktober 1967;

8. Bapak Bupati Soetran, wiwit tahun 1968 ngantos tahun 1975. Ing salebeting Pamerintahan Kabupaten kaasta dening Bapak Soetran, Kabupaten Trenggalek mujudaken Kabupaten wiwitan ing Jawi Wetan, ingkang saged nampi : “Parasamya Purnakarya Nugraha” ing tahun 1974. Sasampunipun Bapak Soetran kasengkakaken ing ngaluhur jumeneng Gubernur ing Irian Jaya, kelenggahan Bupati Trenggalek kapitadhosaken dhateng panjenenganipun :

9. Bapak Bupati M. Ch. Poernanto, ngantos titi wanci tumapaking Bupati ingkang enggal;

10.Bapak Bupati Soedarso, ngasta kalenggahan Bupati ing Trenggalek tanggal 4 September 1975 ngantos tanggal 2 Oktober 1985. Inggih ing salebeting pamerintahan kaasta dening panjenenganipun Bapak Bupati Soedarso Trenggalek saged manggihaken sejarahipun piyambak, inggih punika tanggal 31 Agustus 1194 M;

11. Bapak Bupati H. Haroen Al Rasyid wiwit tanggal 2 Oktober 1985 ngantos tanggal 2 Oktober 1990;

12. Bapak Bupati Drs. H. Slamet wiwit tanggal 2 Oktober 1990 ngantos tanggal 2 Oktober 1995;

13. Bapak Bupati Drs. H. Ernomo, wiwit tanggal 2 Oktober 1995 ngantos 2 Oktober 2000;

14. Bapak Bupati Ir. H. Mulyadi WR, ngasta kalenggahan Bupati ing Trenggalek wiwit tanggal 2 Oktober 2000 2 Oktober 2005;

15. Bapak Bupati H. Soeharto, ngasta kalenggahan Bupati Trenggalek wiwit tanggal 2 Oktober 2005 ngantos ing dinten samangke.

Tuwuh lan ngrembakanipun Trenggalek punika tetela beda sanget kaliyan tuwuh lan ngrembakanipun Kabupaten sanes, sanadyanta sami-sami tanah paredenipun.
Oyoding tembung Treng lan Gale punika cundhuk lan mungguh kaliyan wujud saha wataking bumi ing Trenggalek, ing wasananipun karana sala-kaprahing pangucap dados Trenggalek. Pramila saking punika, minangka pandonga saha pamuji ingkang hamungkasi ringkesaning “Sejarah Trenggalek” punika mijil sesanti : JAYA WIJAYAGUNG TRENGGALEK JAYATI.